එසේම මාධ්‍ය මගින් ඒ සඳහා ජනතාව පෙළගැස්විය යුතු බවද ඔහු කීය. වගා කටයුතු සඳහා ජලය බෙදාහැරීම අවම කර ඇත්තේ ජනතාවගේ පානීය ජල අවශ්‍යතාව ඇතුළු අනෙකුත් අවශ්‍යතා සඳහා ජලය ආරක්ෂා කරගැනීමට බවද ඒ මහතා කියා සිටියේය.
ජනතාව අරපිරිමැස්මකින් යුතුව විදුලිය භාවිත නොකරන්නේ නම් 2017 වසරේ විදුලි කප්පාදුවක් පවා සිදුවීමට වැඩි ඉඩක් ඇති බව විදුලිබල හා පුනර්ජනනීය බලශක්ති අමාත්‍යවරයා තමන්ට පැවසූ බවද ඇමතිවරයා සඳහන් කළේය. 1974 වසරෙන් පසු ශ්‍රී ලංකාවට බලපාන දැරුණුම නියඟය මෙය වනු ඇති බවත්, එයට සාමූහිකව මුහුණදිය යුතු බවත් ඔහු කීය.
මෙහිදි තවදුරටත් අදහස් දැක්වූ අනුර ප්‍රියදර්ශන මහතා පැවසුවේ නියඟයට මුහුණදීම සඳහා ඇතැම්විට විදෙස් ආධාර පවා ඉල්ලීමට සිදුවනු ඇති බවයි. නියඟයට මුහුණදෙන ආකාරය පිළිබඳ සකස්කළ විශේෂ කැබිනට් පත්‍රිකාවක් එළඹෙන 03 වැනිදා කැබිනට් මණ්ඩලය හමුවට ඉදිරිපත් කිරීමට කටයුතු කරන බවද අනුර ප්‍රියදර්ශන මහතා කියා සිටියේය.
මෙහිදී මාධ්‍යයට ජනතාව දැනුවත් කිරීම පිළිබඳ සුවිශේෂී කාර්යභාරයක් පවතින බව පෙන්වාදුන් අමාත්‍යවරයා රජයට හා මාධ්‍යයට වෙන්ව යා නොහැකි බවද සඳහන් කළේය.මාධ්‍ය ආයතන හරහා නියඟයෙන් ජනතාවට සිදුවන අවහිරතා මගහරවාගැනීම සඳහා දිගින් දිගටම වැඩසටහන් සංවිධානය කරන ලෙසත්, දැන්වීම් හා නිවේදන හරහා ජනතාව දැනුවත් කිරීමට පොළඹවන ලෙසත් අමාත්‍යවරු මෙහිදී ඉල්ලා සිටියහ.
