කොවිඩ් 19 වයිරසය ව්‍යාප්තිය පාලනය සඳහා වන මෙම මාර්ගෝපදේශ හතළිස් හය සෞඛ්‍ය සේවා අධ්‍යක්ෂ ජනරාල්වරයා විසින් පෙරේදා (27 වැනිදා) ප්‍රකාශයට පත් කළේය. මෙම මාර්ගෝපදේශ ප්‍රායෝගිකව ක්‍රියාත්මක කළ නොහැකි බැවින් සංශෝධනය කරන ලෙස ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය සහ ප්‍රාදේශීය සෞඛ්‍ය වෛද්‍ය නිලධාරීන් සෞඛ්‍ය සේවා අධ්‍යක්ෂ ජනරාල්වරයාගෙන් ඉල්ලා තිබේ.
ප්‍රායෝගිකව නොසිතා සමාජයට විහිළු සපයන ආකාරයෙන් මෙම මාර්ගෝපදේශ සෞඛ්‍ය අමාත්‍යාංශ නිලධාරීන් සකස් කර ඇති බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ පවසයි. කුලී රථ සේවා, ත්‍රිරෝද රථ භාවිතය, බයිසිකල් පැදීම, ඇවිදීමේ මංතීරු, සම්මන්ත්‍රණ හා වැඩමුළු, උපකාරක පන්ති, ප්‍රසිද්ධ රැස්වීම් ඇතුළු ක්ෂේත්‍ර හතළිස් හයක් සඳහා සකස් කළ මෙම මාර්ගෝපදේශ සෞඛ්‍ය අමාත්‍ය පවිත්‍රා වන්නිආරච්චි විසින් ජනාධිපතිවරයා වෙතද ඉදිරිපත් කර ඇත.
මෙම මාර්ගෝපදේශ ක්‍රියාත්මක කිරීමේදී අදාළ ක්ෂේත්‍රයට අවශ්‍ය වන සෞඛ්‍ය උපදෙස් සහ සෞඛ්‍ය සහතික පළාත් පාලන ආයතවලින් ලබා ගැනීමට නිර්දේශ කිරීම විහිළුවක් බවද ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ වැඩිදුරටත් පැවැසුවේය.
– aruna
