තරග කළ කලාකරුවන් අතුරින්ම වැඩියෙන්ම මනාප ලබාගෙන ඇත්තේ ශ්‍රී ලංකා පොදුජන පෙරමුණෙන් අනුරාධපුර දිස්ත්‍රික්කයට තරග කළ රංගන ශිල්පී උද්දික ප්‍රේමරත්නයි.
උද්දික ප්‍රේමරත්න මනාප 133,350 ක් ලබාගත්තේ අනුරාධපුර දිස්ත්‍රික්කයෙන් තේරී පත් වූ අපේක්ෂකයින් අතරින් දෙවැනි ස්ථානය හිමිකර ගනිමිනි.
දෙවැනියට වැඩිම මනාප ලබාගත් කලාකරුවා වන්නේ සමඟි ජන බලවේගයෙන් ගම්පහ දිස්ත්‍රික්කයට තරග කළ ජනප්‍රිය රංගන ශිල්පී රන්ජන් රාමනායකයි.
ඔහු මනාප 103,992 ක් ලබාගත්තේ එම පක්‍ෂයේ ගම්පහ දිස්ත්‍රික් ජයග්‍රාහකයන් අතර දෙවැනියා බවට පත්වෙමිනි.
ශ්‍රී ලංකා පොදුජන පෙරමුණෙන් පාර්ලිමේන්තුවට තේරී පත්වූවන් අතර කලාකරුවන් තවත් දෙදෙනකු සිටින අතර ඒ ප්‍රවීණ රංගන ශිල්පිනී ගීතා කුමාරසිංහ හා රංගන ශිල්පී පියල් නිශාන්තයි.
ගීතා කුමාරසිංහ ගාල්ල දිස්ත්‍රික්කයෙන් මනාප 63,358ක් ලබාගනිමින් පාර්ලිමේන්තුවට තේරී පත්වූ අතර කළුතර දිස්ත්‍රික්කයෙන් තරඟ කළ පියල් නිශාන්ත ද සිල්වා මනාප 103,904ක් ලබා ගත්තා.
ඔවුන් හැර තරඟ කළ සියලු කලාකරු අපේක්‍ෂකයන් මෙවර මහ මැතිවරණයේ දී පරාජයට පත්වූ අතර ශ්‍රී ලංකා පොදුජන පෙරමුණෙන් ගම්පහ දිස්ත්‍රික්කයට තරග කළ මධුමාධව අරවින්ද (මනාප 28,412), බූරුවන්ද ලයිස්තුවේ සිටින බව කියමින් බදුල්ල දිස්ත්‍රික්කයට තරග කළ ඕෂධී හේවාමද්දුම (මනාප 10,957) යන දෙදෙනා ද ඒ අතර වනවා.
සමඟි ජන බලවේගයෙන් කොළඹ දිස්ත්‍රික්කයට තරග කළ චිත්‍රපට රංගන ශිල්පියකු ද වන සුජීව සේනසිංහ (මනාප ඡන්ද 30,572) කුරුණෑගල දිස්ත්‍රික්කයට තරග කළ ගායන හා සංගීත ශිල්පී රූකාන්ත ගුණතිලක (මනාප 26,088) සහ කළුතර දිස්ත්‍රික්කයට තරග කළ රංගන ශිල්පී රවීන්ද්‍ර යසස් කුමාරනායක (මනාප 9836) යන මහත්වරු ද මැතිවරණයෙන් පරාජයට පත් වුණා.
ජාතික ජන බලවේගයෙන් කොළඹ දිස්ත්‍රික්කයට තරග කළ විමල් කැටිපෙආරච්චි (මනාප 12,913) ද පරාජයට පත්වූ කලාකරුවන් අතර වනවා.
මිට අමතරව ප්‍රධාන දේශපාලන පක්‍ෂවල ජාතික ලැයිස්තුවේ ද කලාකරුවන් නම්කර තිබූ අතර ශ්‍රී ලංකා පොදුජන පෙරමුණු ජාතික ලැයිස්තුවෙන් රංගන ශිල්පී ජයන්ත කැටගොඩ පාර්ලිමේන්තු මන්ත්‍රීවරයකු ලෙස පත්කර තිබෙනවා.
මීට අමතරව සමගි ජන බලයෙන් රංගන ශිල්පිනී ඩයනා ගමගේ සහ ජාතික ජන බලවේගයේ ජාතික ලැයිස්තුවෙන් සංගීතවේදී නදීක ගුරුගේ, රංගන ශිල්පීන් වන දීපානි සිල්වා, ජගත් මනුවණ යන කලාකරුවෝද නම් කරනු ලැබ සිටියා.
එම පක්ෂ දෙකෙන් ජාතික ලැයිස්තු ධුර ලබාදෙන අපේක්‍ෂකයන් කවුරුන්ද යන්න ඊයේ (09) සවස් වන තුරුත් නම් කර තිබුනේ නෑ.
