චීනයේ එක්සිම් බැංකුවෙන් රුපියල් කෝටි 1880ක පමණ ණය මුදලක් ලබාගෙන ඉදිකළ 'නෙළුම් කුළුණ' ඉකුත් 2019 සැප්තැම්බර් මස 16 වන දින විවෘත කළත් පවතින කොවිඩ්-19 වසංගත තත්ත්වය හේතුවෙන් ඉන් කිසිදු ආදායමක් ලබාගැනීමට හැකි වී නැතැයි අනාවරණය වේ.
මෙම ණය මුදලට අදාළව වසරකට පොලිය පමණක් රුපියල් මිලියන 560ක් පමණ ගෙවීමට සිදුව ඇතැයි විදුලි සංදේශ නියාමන කොමිෂන් සභාවේ උසස් නිලධාරියෙක් 'මව්බිම' ට පැවැසීය.
දකුණු ආසියාවේ ඇති උස ම කුළුණ වන මෙය ලෝකයේ උස ම කුළුණු අතර 19 වන ස්ථානයේ තිබේ.
කැරකෙන අවන්හලකින් (Rotate Restaurant) ද සමන්විත 'නෙළුම් කුළුණ' නැරඹීමට කොවිඩ්-19 වසංගත තත්ත්වය නිසා දෙස් විදෙස් සංචාරකයන් නොපැමිණීම හේතුවෙන් මෙම කුළුණේ ආදායම් මාර්ග ඇහිරීගොස් ඇත.
මෙම කුළුණ සන්නිවේදන මධ්‍යස්ථානයක් බවට පත්කිරීමට සැලසුම් කර තිබූ අතර එහි ඇති මහල් කුලියට දීමේ කටයුතු ද මෙතෙක් සාර්ථකව සිදුවී නැතැයි හෙතෙම කීය.
මේ සම්බන්ධයෙන් විදුලි සංදේශ නියාමන කොමිෂන් සභාවේ අධ්‍යක්ෂ ජනරාල්වරයාගෙන් විමසීමට දින දෙක තුනක් ම උත්සාහ ගත්ත ද ඔහුගේ කාර්යාලයීය දුරකතන විමසීම්වලට කිසිවකුගෙන් පිළිතුරක් නැත.
මේ සම්බන්ධයෙන් ජනමාධ්‍ය අමාත්‍ය කෙහෙළිය රඹුක්වැල්ල මහතාගෙන් 'මව්බිම' කළ විමසීමේදී ඒ මහතා කියා සිටියේ, 2016 වසරේදී විවෘත කිරීමට තිබූ මෙම කුළුණේ වැඩකටයුතු ඉකුත් පාලන කාලය තුළ ඇදි ඇදී කෙරුණු බවයි.
සංචාරකයන් ආකර්ෂණය කර ගනිමින් විශේෂ සංචාරක කලාපයක් නිර්මාණය කිරීමට එවකට සිටි රාජපක්ෂ රජය සැලසුම් කර තිබුණ ද 2015 වසරෙන් පසු ඒ කටයුතු සියල්ල වෙනසකට භාජන වූ බව ද ඇමතිවරයා සඳහන් කළේ ය.
කෙසේ වෙතත් නෙළුම් කුළුණ හා ඒ ආශ්‍රිත ප්‍රදේශය දෙස් විදෙස් සංචාරකයන්ට ආකර්ෂණය වන පරිදි සකසා මෙම කුළුණ ඉදිකිරීමෙන් බලාපොරොත්තු වූ ආදායම් ලබාගැනීමට අවශ්‍ය කටයුතු යොදන බව ද ඒ මහතා පැවසීය.
